வார்த்தை சூழ் வாழ்க்கை

'ஹாப்பி பர்த்டே'-களுக்கு
இடையில் தவழ்ந்து வரும்
வாழ்க்கை பின்னர்
ஒரு மையலான 'ஹாய்'-ல் சிக்கி
பின்பு கசப்பான ஒரு 'குட்-பை'யில்
சிதறுண்டுவிடுகிறது.

பிறிதொரு பொழுதில்
ஒரு கங்ராட்ஸ்-ல்
தடம் மாறும் வாழ்க்கை
ஹாப்பி வெட்டிங் டே-யில் நழுவி பழையபடி ஹாப்பி பர்த்டேயில்
தஞ்சம் அடைகிறது.

நடை தளர்ந்து
விஷ் யு ஸ்பீடி ரெகவரி- யில் தடுமாறும் அந்த வாழ்க்கை
இறுதியாக ஆர்ஐபி-யில்
புதைந்துவிடுகிறது.

இதற்கு நடுவில்,
வார்த்தைகளால் சூழ்ந்த
இந்த உலகில்,
அவனுக்கான அவனது நாளை
மனிதன்
எப்போது வாழப்போகின்றான்?